एडमन्टन, क्यानडा | ११ जुन २०२६
फिफा विश्वकप २०२६ का लागि अमेरिका पुगेका केही खेलाडी तथा खेल अधिकारीमाथि भेदभावपूर्ण व्यवहार गरिएको आरोप सार्वजनिक भएको छ।
सामाजिक सञ्जालमा भाइरल भएका केही भिडियोहरूमा सेनेगल, उज्बेकिस्तान तथा सोमालियासँग सम्बन्धित खेलाडी र अधिकारीहरूलाई विमानस्थलमा अतिरिक्त सुरक्षा जाँच गरिएको देखिएको दाबी गरिएको छ। यस घटनापछि खेलाडी तथा खेल अधिकारीहरूमाथि अपराधीजस्तै व्यवहार गरिएको भन्दै सामाजिक सञ्जालमा व्यापक आलोचना भइरहेको छ।
यसैबीच, सोमाली रेफ्री उमर आर्टनलाई वैध भिसा हुँदाहुँदै पनि मियामी विमानस्थलबाट अमेरिका प्रवेश गर्न अनुमति नदिइएको समाचार सार्वजनिक भएको छ। विश्वकपमा रेफ्रीको भूमिका निर्वाह गर्ने पहिलो सोमाली अधिकारी बन्ने तयारीमा रहेका आर्टनलाई अतिरिक्त जाँचपछि प्रवेश अस्वीकृत गरिएको बताइएको छ।
सोमालियाको खेल मन्त्रालयले उक्त निर्णयप्रति असन्तुष्टि जनाउँदै यसलाई खेल भावनाविपरीत भएको टिप्पणी गरेको छ। सामाजिक सञ्जाल प्रयोगकर्ताहरूले पनि प्रतियोगितामा सहभागी खेलाडी र अधिकारीहरूमाथि गरिएको व्यवहारप्रति प्रश्न उठाएका छन्।
यता, केही देशका समर्थकहरूलाई टिकट तथा यात्रा व्यवस्थामा समस्या परेको दाबीसमेत सार्वजनिक भएको छ।
