२४ जुलाई २०२६ | एडमन्ट क्यानडा
क्यानडाको क्यालगरीमा हराइरहेका ११ वर्षीय बालक Parker Wells अझै फेला परेका छैनन्। उनी हराएको ९ दिन पुगे पनि खोजी अभियान निरन्तर जारी रहेको क्यालगरी प्रहरीले जनाएको छ।
प्रहरीका अनुसार, पार्कर न्युरोडाइभर्जेन्ट हुन् र बोल्न सक्दैनन्। अपरिचित व्यक्तिसँग उनी डराउन सक्ने भएकाले भेटिएमा नआत्तिन र तुरुन्त प्रहरीलाई खबर गर्न आग्रह गरिएको छ।
प्रहरीले पार्करलाई जीवितै फेला पार्न सकिने आशा अझै कायम रहेको जनाएको छ। खोजी अभियानमा ड्रोन (RPAS), विशेष तालिमप्राप्त क्यानाइन टोली, प्रहरी, अग्निनियन्त्रक, खोज तथा उद्धार टोली र सयौं स्वयंसेवक परिचालन गरिएका छन्।
खोजी टोलीले कुनै पनि सम्भावित सुराकी नछुटोस् भनेर क्षेत्रलाई योजनाबद्ध रूपमा विभाजन गरी खोजी गरिरहेको छ। पैदल पुग्न कठिन स्थानमा ड्रोन प्रयोग गरिएको छ भने आवश्यक क्षेत्रमा खोजीकर्ताहरूलाई नजिक–नजिक परिचालन गरेर प्रत्येक स्थान सावधानीपूर्वक जाँच भइरहेको प्रहरीले जनाएको छ।
प्रहरीका अनुसार, अत्यधिक गर्मी र कठिन भू–भागका कारण खोजी चुनौतीपूर्ण बनेको छ। तर अनुसन्धानबाट प्राप्त सूचना, खोज व्यवस्थापनका सिद्धान्त तथा हराएका व्यक्तिको व्यवहारसम्बन्धी अध्ययनका आधारमा अभियानलाई निरन्तरता दिइएको छ।
पार्करलाई अन्तिम पटक जुलाई १६ मा क्यालगरीको थोर्नक्लिफ क्षेत्रमा देखिएको थियो। प्रहरीले स्थानीय बासिन्दालाई आफ्ना घर, डेकमुनि, शेड, हट टब, झाडी तथा अन्य सम्भावित स्थानहरू पुनः जाँच गर्न अनुरोध गरेको छ।
पार्करबारे कुनै पनि जानकारी भए, त्यो सानो भए पनि, तत्काल क्यालगरी प्रहरीलाई जानकारी गराइदिन प्रहरीले सबैसँग आग्रह गरेको छ।
